Rreth Nesh

Rreth Nesh

Medica Gjakova (MGJ) është themeluar në korrik të vitit 2011 si organizatë joqeveritare nga një grup individësh të përkushtuar të cilët kanë punuar së bashku që nga gushti i vitit 1999 në Gjakovë dhe zonat përreth, në kuadër të Medica Mondiale (MM). Misioni i organizatës është “të përmirësojë mirëqenien mendore dhe fizike të grave të traumatizuara, me fokus të veçantë tek ato që i kanë mbijetuar dhunës seksuale gjatë luftës në Kosovë, dhe të ndikojë në politikat sociale për të mbështetur mirëqenien e këtyre të mbijetuarve dhe integrimin e tyre në të gjitha fushat e jetës”.

Për të arritur këtë mision, stafi drejtues dhe profesional në MGJ implementojnë aktivitete themelore si këshillimi psikologjik dhe gjinekologjik, si dhe shërbime që synojnë fuqizimin ekonomik. Përveç këtyre shërbimeve thelbësore, MGJ kryen gjithashtu avokim social dhe politik për të rritur ndërgjegjësimin e publikut të gjerë dhe politikëbërësve për sfidat me të cilat përballen gratë e mbijetuara të krimeve të luftës, duke theksuar nevojën për politika që sigurojnë mirëqenien dhe integrimin e tyre social. Nëpërmjet këtyre përpjekjeve të kombinuara, MGJ ka ndihmuar gratë të përballen me stigmën sociale dhe të sfidojnë temat tabu që ndikojnë drejtpërdrejt në të drejtat e njeriut dhe të drejtat e grave.